मजदुर अगुवा गौतम मजदुरकै निम्ति लड्दा लड्दै अस्ताए

कात्तिक, बुटवल । विद्युत् महसुल बक्यौता नतिरेको भन्दै उद्योगहरूको बिजुली लाइन काटिएपछि प्रभावित मजदुरहरूको पक्षमा आयोजित कार्यक्रममा बोल्दै गर्दा मजदुर नेता कमल गौतमको आकस्मिक निधन भएको छ । ६४ वर्षीय गौतम बुटवलमा आयोजित विरोध प्रदर्शनमा सम्बोधनका क्रममा ढलेका थिए । उनलाई तुरुन्तै मणिग्रामस्थित क्रिमसन अस्पताल पुर्याइए पनि चिकित्सकले मृत घोषणा गरेका थिए । प्रारम्भिक अनुमान अनुसार उनलाई हृदयाघात भएको बताइएको छ । गौतमले कार्यक्रममा भनिरहेका थिए, “सरकारको कदमले २५ हजार मजदुरको रोजीरोटी खोसिँदैछ,” त्यति भन्नासाथ उनी लडिरहेका थिए । तीन दशकदेखि मजदुर आन्दोलनमा सक्रिय गौतमले २०४० सालमा संयुक्त वाम मोर्चाबाट आफ्नो राजनीतिक यात्रा सुरु गरेका थिए । उनले जिफन्ट, रिक्सा युनियन अध्यक्ष, एमाले लुम्बिनी अञ्चल सदस्य, र पार्टी केन्द्रीय सदस्य हुँदै मजदुर अधिकारको लडाइँमा लामो समय बिताएका थिए । उनको निधनप्रति नेकपा (एमाले) रुपन्देही अध्यक्ष यज्ञ गैरेले गहिरो दु:ख व्यक्त गर्दै भने, “मजदुर वर्गको हक अधिकारका लागि जीवनभर लड्ने योद्धाको निधनले सम्पूर्ण श्रमिक समुदाय मर्माहत भएको छ।” स्व. गौतमका श्रीमती र दुई छोरा छन्

Redirecting... Please wait.