एकै परिवारका ४ जना घाइते: घटनाको जाहेरी प्रहरीले दर्ता नगरेको आरोप

                               

जनकपुरधाम ।

सिरहाको मिर्चेया नगरपालिका–३ छड्की टोलमा भएको एकै परिवारमाथिको आक्रमणको घटनाले प्रहरीमाथि गम्भीर प्रश्न उठाएको छ। पीडित परिवारले दोषीहरूलाई उम्काउने र जाहेरी दर्ता गर्न अस्वीकार गर्ने आरोप प्रहरीमाथि लगाएका छन्।

कात्तिक २ गते बेलुका करिब १५–२० जनाको समूहले स्थानीय शिवनन्दन यादवको घरमै पसेर परिवारमाथि आक्रमण गरेको थियो।

खुकुरी, रड, भाटा लगायतका हतियारले आक्रमण गर्दा ६० वर्षीय शिवनन्दन यादव, उनकी श्रीमती ५७ वर्षीया दुर्गी देवी यादव, छोरा ४२ वर्षीय जमाहिर यादव र बुहारी ३७ वर्षीया रिता यादव घाइते भएका थिए।

पीडित शिवनन्दन यादवका अनुसार,

“हामी घरमै बसिरहेका बेला समूह आएर निहुँ बिना नै प्रहार गरे। पक्राउ परेकामध्ये तीन जनालाई राजनीतिक दबाबमा प्रहरीले छाडिदियो। अब जाहेरी दर्ता गर्न गएका हौं भने उल्टै दोषीको नाम हटाउन भन्छन्।”

उनले प्रहरीमाथि न्याय नदिने र अपराधीलाई बचाउने आरोपसमेत लगाएका छन्।

🔹 घटनाको पृष्ठभूमि

इलाका प्रहरी कार्यालय मिर्चेयाका डिएसपी राजेशराज पुरीका अनुसार, केही समयअघि जीतवाहन मेलामा दुई किशोरबीच भएको विवाद नै घटनाको मूल कारण बनेको हो। सोही विवादका कारण दुवै पक्षबीच झगडा र कुटपिट भएको र पछि अर्को समूहले यादव परिवारमाथि आक्रमण गरेको उनले जानकारी दिए।

घटनापछि प्रहरीले पूर्ववडाध्यक्ष हरिकुशियैत यादव, किशोर धुर्झार यादव, अशोक यादव, र जगदीश धर्झार यादव सहित पाँचजनालाई पक्राउ गरेको थियो।

तर, पीडित पक्षका अनुसार, तीमध्ये तीन जनालाई राजनीतिक दबाबमा रिहा गरिएको छ।

डिएसपी पुरीले भने,

“अनुसन्धानका क्रममा ती व्यक्तिहरू घटनामा संलग्न नभएको प्रमाणित भएको छ। संलग्न नभएका व्यक्तिको नाम जाहेरीमा राखेकाले त्यसरी दर्ता गर्न मिल्दैन।”

🔹 पीडित परिवारको प्रश्न

पीडित पक्षले भने अनुसन्धान निष्पक्ष नभएको र प्रहरीकै दबाबमा जाहेरी दर्ता रोकिएको दाबी गरेका छन्।

“दोषीको नाम हटाएर मात्रै जाहेरी दर्ता हुन्छ भनिन्छ, अनि न्याय कसरी पाउने?” — शिवनन्दन यादव

यस घटनाले स्थानीय स्तरमै प्रहरीको निष्पक्षता र राजनीतिक हस्तक्षेपमाथि गम्भीर प्रश्न उठाएको छ।

Redirecting... Please wait.