६० किलो सुन तस्करी प्रकरणमा दावासहित १०...

असोज, काठमाडौं । ब्रेक प्याडमा लुकाएर ल्याइएको ६० किलो सुन तस्करी प्रकरणमा संलग्न अधिकांश चिनियाँ तस्कर कारागारबाट फरार भएको खुलेको छ । जेनजी आन्दोलनका क्रममा भदौ २४ गते राति देशभरका विभिन्न कारागारमा तोडफोड र आगजनी हुँदा सुन तस्करीमा संलग्न चिनियाँ कैदीहरू पनि भागेका हुन् । गृह मन्त्रालयका अनुसार, ललितपुरको नख्खु कारागार र काठमाडौंको **सुन्धारास्थित केन्द्रीय कारागार (जगन्नाथदेवल)**मा रहेका ती कैदीबन्दीमध्ये २५ जना चिनियाँ नागरिक फरार भएका छन् । तीमध्ये १० जना ६० किलो सुन तस्करी प्रकरणमा जेल चलान गरिएका व्यक्ति हुन् । कारागार व्यवस्थापन विभागका सहसचिव तथा प्रवक्ता चोमेन्द्र न्यौपानेका अनुसार फरार कैदीहरूमध्ये मुख्य नाइके दावा छिरिङ (निमा तामाङ) पनि छन् । दावाले काभ्रेबाट झूटो विवरणमा नेपाली नागरिकता र राहदानी लिएका थिए, जसमा ५ वर्ष कैद र १ लाख रुपैयाँ जरिवाना (नागरिकता कीर्ते) र ३ वर्ष कैद तथा ३० हजार जरिवाना (राहदानी प्रकरण) सजाय सुनाइएको थियो । दावाले रोल्पाकी माओवादी नेतृ अमला रोकासँग विवाह गरेका थिए । उनीहरूको नाममा ठमेलस्थित होटल भियना रहेको र सोही होटलमा बसेर सुन तस्करीको योजना बनाउने गरिएको प्रहरी अनुसन्धानले देखाएको थियो । दावा छिरिङको उच्चस्तरीय राजनीतिक र प्रहरी वृत्तसँग घनिष्ठ सम्बन्ध रहेको प्रहरी स्रोतले जनाएको छ । अनुसन्धानका क्रममा दावाको अध्यागमन विभागका तत्कालीन महानिर्देशक झलकराम अधिकारीसँग म्यासेज आदानप्रदान भएको विवरण समेत फेला परेको थियो । फरार भएको एक महिना नाघिसकेकाले ती चिनियाँ समूह नेपाल छाडिसकेको हुनसक्ने आशंका गरिएको छ । स्रोतका अनुसार, गृह मन्त्रालयले अन्तर्राष्ट्रिय अपराध नियन्त्रण संगठन (इण्टरपोल) सँग रेड नोटिस जारी गर्न तयारी गरिरहेको छ ।

Redirecting... Please wait.